«Արին Արմէնեան՝ Վաղամեռիկ Բանաստեղծուհին» յօդուածի առթիւ Արինի հօրեղբայրը Կարօ Արմէնեան հետևեալ շնորհակալական և երախտագիտական երկտողը ուղարկած է «Նշանակ»ին անգլիատառ Հայերէնով, որ «հայացնել» է ետք կը հրապարակենք նոյնութեամբ: «Նշանակ» իր խորին շնորհակալութիւնը կը յայտնէ անաչառ և նուիրուած ազգային գործիչ Կարօ Արմէնեանին և կը մաղթէ առողջութիւն և ծրագիրներու իրականացում:
«Նշանակ»
______________________________________________________
Սիրելի Նշան,
Երէկ իրիկուն, եղբօրս Յարութիւնին հետ կապուելու նպատակով հեռաձայնեց բարեկամդ՝ Հրաչ Արզումանեանը(Ֆիլատէլֆիայէն) և այդ առիթով միայն տեղեկացայ քու ստեղծած կայքէջիդ գոյութեան մասին: Անշուշտ անմիջապէս տեղեակ պահեցի Յարութը, որ ներկայիս Երևան կը գտնուի, և անշուշտ անմիջապէս բացի «Նշանակ»ը: Բնականաբար,ինծի և կնոջս Վրէժուհիին համար շատ յուզիչ պահ մըն էր կարդալ Արինին մասին գրած տողերդ, բայց նաև յուզիչ էր այս շատ հարազատ և ընտանի կայքէջը ստեղծելու քու նախաձեռնութիւնդ: Սրտանց կը շնորհաւորեմ: Յայտնեմ, որ շատ տպաւորիչ կը գտնեմ էջադրութիւնը, տառանմուշներու ընտրութիւնը և կայքէջին ընդհանուր տրամադրութիւնը (եթէ կարելի է այդպիսի բնորոշում տալ): Ապրի՜ս: Շատ կարևոր ներդրում մըն է Սփիւռքի տարածքը կազմակերպելու պահանջկոտ ճակատին վրայ:
Յաջողութին
Կարօ Արմէնեան
0 comments:
Հայտնեք Ձեր կարծիքը՝