Յայտարարութիւն

Wednesday, January 20, 2010

Հայ Կնոջ Տարի - Անահիտ Տօնիկեան

Հայ Իրականութեան Մէջ Իրենց Հետքն ու Դրոշմը Թողած Հայուհիներ - 1


Մեր պատմութեան յորձանուտին մէջ բազմաթիւ հայուհիներ իրենց հետքը թողած են իրենց գործերով : Շատեր՝ իրենց ամուսիններու կողքին կռուած են զէն ի ձեռին որպէս ազատատենչ մարտիկներ , նահատակուած են կամ յաղթանակներ տարած: Քրիստոնէութեան Հայաստանի մէջ տարածման գործին մէջ փոքր չէ դերը հայուհիներու:Մարզական, գեղարուեստական,գրական ասպարէզներէ ներս փոքր թիւ չեն ներկայացներ Հայ կանայք:Օրինակները կարելի է շարունակել ...

Հայ Կնոջ Տարուան ընթացքին, ոչ ժամանակագրական հերթականութեամբ,կայքէջիս մէջ տեղ պիտի տրամադրենք հռչակ ունեցող և հռչակ ունենալու արժանի Հայուհիներու :

Այսօր հպանցիկ ակնարկ մը պիտի նետենք հայուհիի մը տարած մէկ աշխատանքին վրայ,աշխատանք մը , որուն , յատկապէս Հայ այրերս, չենք տար այն դրական գնահատանքը որ արժանի է տալ: Այս Հայուհին է Տիկին Անահիտ Փարամազ Տօնիկեանը՝ հեղինակը «Համով Հոտով» ճաշատեսակներու ընդարձակածաւալ՝,560 էջ, հատորին, որուն երկրորդ հրատարակութիւնը կը բաղկանայ բծախնդրօրէն պատկերազարդուած 850 խոհագիրներէ:Անոնք կ՜ընդգրկեն ՝ Թացաններ, Ախորժաբերներ,Ապուրներ,Աղցաններ,Փասթայի տեսակներ,Կոլոլակներ,Մսեղէններ (միս,հաւ,ձուկ,ծովային կենդանիներ,),Խմորեղէններ,Անուշեղէններ,Կարկանդակներ,Քոքթէյլներ,Օշարակներ: Խոհագիրներէն զատ գիրքին մէջ կը գտնենք ընդհանուր գիտելիքներ՝ սեղանի յարդարման,քալորիներու ,փուռի ջերմաստիճանի ,կշիռքի չափերու,համեմներու,բանջարեղէններու, նիւթերու պահպանման և ինչ որ կարելի է երևակայել հայ կին մը բաւարարուած , ուրախ պահելու իր խոհանոցին մէջ կամ անկէ դուրս:
Սեղանը , իր վրայ մատուցուած կերակուրով մեծ դերակատարութիւն ունի ընտանիքի երջանկութեան գործընթացին մէջ: Սակայն,որևէ սեղանի վրայ մատուցուած կերակուր խոհանոցի մը արտադրութիւնն է,ուստի ,խոհանոցը ,բառին լայն բացատրութեամբ,մեծ դեր ունի , սննդական և բարոյական իմաստներով , ընտանիքի մը երջանկութեան մէջ :

Զայս ասած, Տիկ. Տօնիկեան իր ազդեցութիւնը ունի համարեա իւրաքանչիւր Հայ Ընտանիքի խոհանոցին վրայ :Ան իր Միջազգային,Արևելեան,Արաբական,Հայկական,Ասիական,Եւրոպական ճաշատեսակներով , մեր սննդառութեան ծիրէն ներս իր ըսելիքը ունեցաւ վերջին երեսուն տարիներուն և ունի ցայսօր Նոր Զելանտայէն մինչև Շուէտ, Պէյրութէն մինչև Լոս Անճելըս:

Մեզի համար ցանկալի է տեսնել այլ հայուհիներու ներդրումը այս մարզէն ներս:Կը խորհիմ թէ տարբեր պէտք չէ ըլլայ Տիկին Տօնիկեանի բաղձանքը, որովհետև ինչ որ ի նպաստ է հայ հանրութեան իրեն համար ուրախութիւն է:Տիկ. Տօնիկեան իր հետքն ու դրոշմը թողած է Հայ Իրականութեան մէջ երջանկացնելով բազում հայ ընտանիքներ: Թող բազմանան այս ռահվիրային հետքերով քալողներու թիւը:

«Նշանակ»


«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»

0 comments:

Հայտնեք Ձեր կարծիքը՝