Յայտարարութիւն

Wednesday, February 10, 2010

Բանաստեղծութիւններ Սեդա Գրիգորեան

.«.«.«.«.«.«.«.«.«.«.«.«.«.«.«.«.«.«.«.«.«.«.«.«.«.«.«.«.«.«.«.«.«.«.«.«.«.«..«.«.«.

Յատուկ «Նշանակ»ին

Բանաստեղծութիւններ

Հեղինակ՝Oրդ. Սեդա Գրիգորեան



Ուրախութիւն է խմբագրութեանս համար ստանալ գրական ստեղծագործութիւններ տարբեր հեղինակներէ՝ Հայաստանէն, Լիբանանէն, Միացեալ Նահանգներէն: Կայքէջիս խմբագրութիւնը հետագային պիտի փորձէ ներկայացնել իր ընթերցողներուն հայ գրականութեամբ զբաղող և կայքէջիս առաքելութեան հաւատք ունեցող մեր հեղինակ քոյրերն ու եղբայրները:Ստորև՝ Բագին ամսագրի Փոխ Խմբագիր Սեդա Գրիգորեանի կարգ մը բանաստեղծութիւնները:




«Նշանակ»



Հակիրճ կենսագրական

բանաստեղծ և արձակագիր

Սեդա Գրիգորեանի




Սեդա Գրիգորեան ծնած է Պէյրութ, Լիբանան: Նախնական եւ երկրորդական ուսումը ստացած է Լոյսի եւ Կենաց Վարժարանին մէջ: 1989ին Պէյրութի մէջ աւարտած է Համազգայինի Հայագիտական Հիմնարկի գրական բաժնի քառամեայ դասընթացքը, ապա, 1993ին, շրջանաւարտ եղած է Երեւանի Պետական Համալսարանի հայկական բանասիրական բաժանմունքէն:



1983էն ի վեր եւ ընդհատումներով զբաղած է ուսուցչութեամբ, Պէյրութի եւ ապա Մոնթլէալի հայկական զանազան վարժարաններու մէջ դասաւանդելով Հայոց Լեզու եւ Գրականութիւն: 1989էն սկսեալ ընդգրկուած է սփիւքահայ մամուլի խմբագրական աշխատանքներուն մէջ, իբրեւ աշխատակից եւ խմբագրական կազմի անդամ, նախ՝ Պէյրութի «Ազդակ» օրաթերթի (1989-2000), ապա Լոս Անճելըսի «Ասպարէզ» օրաթերթի (2001-2002) եւ Մոնթրէալի «Հորիզոն» շաբաթաթերթի (2004-2008), միաժամանակ հանդէս գալով գրական, հրապարակագրական, եւ ստեղծագործական գրութիւններով: Անոր արձակ եւ չափածոյ գրութիւնները լոյս տեսած են նաեւ Հայաստանի եւ Սփիւռքի հայկական մամուլի եւ գրական տարբեր պարբերականներու մէջ:



Սեդա Գրիգորեան ներկայիս կ'ապրի Պէյրութ եւ կը վարէ «Բագին» գրական հանդէսի փոխ խմբագրի պաշտօն, միաժամանակ հայոց լեզու աւանդելով Ազգ. Լեւոն եւ Սոֆիա Յակոբեան վարժարանի օտարալեզու չափահասներու համար նախատեսած ծրագրի ծիրէն ներս: Ան ցարդ հրատարակած է իր բանաստեղծական երախայրիքը` «Եզերք» խորագրով (Երեւան, 2006), իսկ ներկայիս հրատարակութեան կը պատրաստէ պատմուածքներու եւ արձակ գործերու իր առաջին հաւաքածոն:











.«.«..«.«.«.«.«..«.«.«.«.«..«.«.«.«.«.«.««.«.«.«...«.«.«.«.«.«.«.«.«.«.«.«.«.«.«.«..





ՎԵՐԱԴԱՐՁ


(Մօրս մահուան Բ. տարելիցին առթիւ)


Վերստին դա՞րձ մը

Թէ

Դառնալ- նորէն

Դէպի անոր որ վայր մըն էր երէկ

Օդանաւէն դիտուած մանկութիւն մը լոկ

Որ լոյս ու ստուերի մէջ

Տարուբեր կ՚ըլլար

Հեռու-հեռաւոր անծանօթ ու բիրտ

Արեւանման մոլորակի պէս

------------------------------------------------------------

Իբրեւ թէ ամերիկեան հիւսիսը

Վայր մ՚է կեանքի-վայելքի…



Անիկա հորիզոնական գիծի վրայ է

Սիպերիա կոչուած այն միւս վայրին հետ

Որուն սիւներուն-ճաղերուն ներքեւ

Հարիւր հազարներ արնաքամ ինկան

Մարմնի

Սիրոյ

Սեռի

Հոգիի

Սառնամանիքի մահուան ծաղիկներուն պէս…

-------------------------------------------------------------

Ներէ՛ մայր իմ

Որ առանց քեզի կը վերադառնամ Լիբանան

- Ծննդավա՜յր -

Ուր մարտեան հովեր

Տե՛ս թէ ինչպէս ականջիս կը փսփսան

Կորսուած դիմանկարիդ

ան- յիշողութիւնը



Ու կը փղձկի սիրտս

Չգոյութեանդ լո՜ւռ աստուածներուն պէս

Որոնք վերէն

- է՜ն բարձրէնՔիթս

կը հրեն սա պճլիկ պատուհանին մէջ

Որպէսզի կապոյտին փրփուրներուն հետ

Ես վերստին հոտուըտամ քեզ



Որպէսզի հանդիպումը մեր

Պէյրութեան տաք ջուրերուն պէս

Ըլլայ վերադարձ



Դէպի վայրը այն

Ուր մենք երկա՜ր փնտռեցինք զիրար



Ս.Դ. ԳՐԻԳՈՐԵԱՆ

7 Օգոստոս, 2009

Պէյրութ




«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»

0 comments:

Հայտնեք Ձեր կարծիքը՝

<< >> Գլխաւոր էջ