Ո՞վ է Մանուշակ Պոյաճեան

Հոգեւոր եւ կրօնական կազմակերպութեան մը կազմակերպած Գիրքի ցուցահանդէսի մը ներկայ գտնուեցայ երէկ: Այնտեղ կը վաճառուէր ինծի շատ սիրելի եւ մօտիկ անձի մը ՝ Մանուշակ Պոյաճեանի «Հայ Եկեղեցագիտութիւն» հատորը: Այս մեծ հայուհին քաղցկեղի պատճառով իր մահկանացուն կնքեց ասկէ վեց տարիներ առաջ: Զինք առաջին անգամ ճանչցած եմ 1971ին որպէս Լիբանանի Հայկական Ռատիօժամի տնօրէնուհի : Մանուշակն ու ես գործակցած ենք ազգային եկեղեցական զանազան ասպարէզներու մէջ : Համբերատար , գիտակից , հաւատացեալ , համեստ եւ հիւմուրով լի անձնաւորութիւն մըն էր : Հազիւ վաթսուն էր :Մահացաւ...
Ստորեւ վկայութիւն՝ անխոնջ աշխատող Մանուշակի կենսագրութեան մասին , արտատպուած իր գիրքէն:
«Նշանակ»
»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»»«»«»«»«»«»«»«»«»
Մանուշակ Պօյաճեան ծնած է 1946ին , Պէյրութ: Նախակրթութիւնը կը ստանայ Մայրապետներու Ecole des Filles la Charite եւ Besancon վարժարաններուն մէջ: Ապա ուսումը կը կատարելագործէ Ecole Superieure des Lettres ի մէջ , որուն պատմագիտութեան բաժանմունքէն կը վկայուի Լիսանս ի վկայականով:

Կանուխէն ան կը նետուի ուսուցչական ասպարէզ եւ 1960էն սկսեալ յաջորդաբար կը պաշտօնավարէ Ազգ. Սուրէն Խանամիրեան Քոլէճին , Համազգայինի Ճեմարանին , Հայագիտական Բարձրագոյն Հիմնարկին , Խաչեր Գալուստեան Մանկավարժական Կեդրոնին եւ Մեծի Տանն Կիլիկիոյ Կաթողիկոսութեան Դպրեվանքին մէջ:

1985-1986 տարեշրջանին , տոքթ. Բաբգէն Փափազեանի հետ ան կը հրաւիրուի Ազգ. Եղիշէ Մանուկեան Քոլէճի տնօրէնութեան պաշտօնին: 1989ին , տոքթ. Փափազեանի մահէն ետք , Մանուշակ Պօյաճեան առանձինը կը վարէ Քոլէճի տնօրէնութիւնը:

Կրթական իր ասպարէզին կողքին , Մանուշակ Պոյաճեան կ'ունենայ ազգային-միութենական բեղուն գործունէութիւն: 1970ական տարիներուն ան գլխաւոր աշխատակիցը կ'ըլլայ Լիբանանի հայկական ռատիօժամին: Գործօն մասնակցութիւն կը բերէ Համազգայինի պարի միաւորի վարչութեան , «Բարսեղ Կանաչեան» երաժշտանոցի վարիչ մարմնին եւ «Վանայ Ձայն» ռատիօկայանի աշխատանքներուն: Բազմիցս կ'ընտրուի Համազգայինի Լիբանանի Շրջանային Վարչութեան անդամ, իսկ 1998-2002 ին՝ Կեդրոնական Վարչութեան անդամ:

Մանուշակ Պոյաճեան ուսանողական տարիներէն մաս կը կազմէր Հ.Յ.Դաշնակցութեան: Իր գործունէութեան դաշտերը կը հանդիսանան քարոզչական եւ դաստիարակչական մարզերը: Կը մասնակցի Հայ Դատի աշխատանքներու:

Իբրեւ յանձնառու ԼՕԽական , կնոջական համագումարներու փնտռուած ներկայութիւն կը դառնայ:

Մեծ են Մանուշակ Պոյաճեանին ծառայութիւնները Մեծի տանն Կիլիկիոյ Կաթողիկոսութեան : Իբրեւ անդամ, իսկ 2002էն ետք ՝ իբրեւ ատենապետ կաթողիկոսութեան միջ-եկեղեցական յարաբերութեան յանձնախումբին , ան երկար տարիներ Կաթողիկոսութիւնը կը ներկայացնէ Միջին Արեւելքի Եկեղեցիներու Խորհուրդին եւ Եկեղեցիներու Համաշխարհային Խորհուրդին մօտ:

1991-2005 , ան անդամ կը նշանակուի Եկեղեցիներու Համաշխարհային Խորհուրդի Տեղեկատուական Խորհրդատու յանձնախումբին: 1999էն ետք, Յանձնախումբին ատենապետութիւնը վարելով, իբրեւ խորհրդատու, ան մաս կը կազմէ Խորհուրդի Կեդրոնական Վարչութեան : Միաժամանակ , ան կը գործէ Խորհուրդի ծրագրումի (1999 – 2005) եւ Ուղղափառ Եկեղեցիներու յատուկ յանձնախումբերուն մէջ (2000 – 2005):

Կիլիկիոյ Կաթողիկոսութեան աշխատանքներու ծիրին մէջ , Մանուշակ Պոյաճեան իր նպաստը կը բերէ «Կիլիկիա» թանգարանի պատրաստութեան եւ կաթողիկոսարանէն ներս կատարած մշակութային աշխատանքներուն: Ան մաս կը կազմէր կաթողիկոսարանի Խաչեր Գալուստեան Մանկավարժական Կեդրոնի Յանձնախումբին:

Յետ մահու, Ն.Ս.Օ.Տ.Տ. Արամ Ա. Կաթողիկոս զինք պարգեւատրեց «Ս.Մեսրոպ Մաշտոց»ի շքանշանով:
«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»
Յաջորդիւ պիտի ներկայացնենք Արամ Ա. Վեհափառ Հօր «Հայրապետական Գնահատանք» ը Մանուշակ Պոյաճեանին անձին ու գործին : ( Նշանակ)



«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»