Յարգարժան Համազգային
Հայ Կրթական եւ Մշակութային Միութեան
Աւստրալիոյ Շրջանային Վարչութիւն եւ
«Համազգային Աւստրալիոյ Լրատու»ի Խմբագրական Կազմ
Սիտնի
28 Մայիս 1928-ին, Գահիրէի մէջ, «Համազգային»ը ծնաւ
որպէս «Համազգային Հրատարակչական ու Մշակութային
Ընկերակցութիւն»: Հիմնադիրներուն համար յստակ էր որ
հրատարակչութիւնը կենսական էր մշակոյթի զարգացման
գործընթացին համար:
Հրատարակչական աշխատանքը շատ աշխուժ էր քսաներորդ
դարու մանաւանդ երկրորդ կիսուն: Դասագիրքերէն սկսեալ մինչեւ
վէպեր, պատմական թէ բանասիրական ուսումնասիրութիւններ,
Հայ արուեստին եւ ճարտարապետութեան նուիրուած կոթողային
հատորներ, գրական հանդէսներ, լրատուներ, պարբերաթերթեր կը
տպուէին Համազգայինի կողմէ, սեփական կամ այլ տպարաններու մէջ:
ՀԱՄԱԶԳԱՅԻՆԸ ԻՐ ԱՌԱՔԵԼՈՒԹԵԱՆ ՄԷՋ ԷՐ:
Քսանմէկերորդ դարու համաշխարհային հրատարակչական աշխատանքը, մշակութային զարգացումը արդիական այլ միջոցներով կը կատարուի: Պահելով աւանդականը, Համազգայինը իր հրատարակչական առաքելութիւնը կը շարունակէ յարմարելով արդի պայմաններուն:
ՀԱՄԱԶԳԱՅԻՆԸ ԻՐ ԱՌԱՔԵԼՈՒԹԵԱՆ ՄԷՋ Է՛:
Սիտնին ու Մելպուրնը հարաւային կիսագունդի տարբեր մշակոյթներու խաչմերուկ-քաղաքներ են:
Համազգայինը իր մասնաճիւղերով եւ միաւորներով կրթա-մշակութային գնահատելի եւ որակաւոր աշխատանք կը տանի: Մինչ Լրատուի հրապարակումը, ան կը թերանար իր ծաւալուն աշխատանքը Հայ հասարակութեան սեփականութիւնը դարձնելուն մէջ, չունենալով գրաւոր հաղորդակցութեան միջոց՝ կապ հաստատելու աւստրալահայ ինչպէս նաեւ հայրենի ու արտասահմանեան Հայ համայնքներուն հետ: Ուշացումով, Համազգայինի շրջանային վարչութիւնը հանդէս եկաւ լրատուով մը, որուն առաջին թիւին՝ Սեպտեմբեր 2021-ի բովանդակութիւնը, կը հաստատէ մեր վերը կատարած նշումը: Այսպիսով, Համազգայինը նախաքայլը կ’առնէ իր ծաւալած հարուստ գործունէութեան մասին տեղեակ պահելու ընթերցողները: Այս լրատուով Համազգայինը սկսաւ խօսիլ Հայ համայնքին
հետ: Մշակութասէր զանգուածներու համար աշխատանք ծաւալելու հրաւէ՛ր է լրատուն, ժրաջան համազգայնականին համար՝ «վարձքդ կատար»ն է լրատուն, շրջանային թէ այլ վարչութիւններու համար՝ մարտահրաւէր է լրատուն, Շանթի, Աղբալեանի եւ իրենց գործակիցներուն տեսլականին ջրաղացին ջո՛ւր է լրատուն:
ԻՐ ԱՌԱՔԵԼՈՒԹԵԱՆ ՄԷՋ ԿԸ ՇԱՐՈՒՆԱԿԷ՛ ՄՆԱԼ ՀԱՄԱԶԳԱՅԻՆԸ:
Թող այս լրատուին հրատարակութիւնը, առցանց թէ տպուած, շարունակական ըլլայ, աճի ու բարգաւաճի առանց ընդմիջումի եւ իր արժանաւոր տեղը գտնէ աւստրալահայ մամուլի շարքերուն մէջ:
Այս հրատարակութիւնը Աւստրալիոյ Համազգայինի մշակութային գործունէութեան դրսեւորման նոր շնչերակն է:
Պարզապէս գնահատելի ու շնորհաւորելի նախաձեռնութիւն:
Անկեղծ բարեմաղթանքով՝
Նշան Պասմաճեան
Օքլանտ - Նոր Զելանտա - 18 Հոկտեմբեր 2021_
«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»«»
0 comments:
Հայտնեք Ձեր կարծիքը՝